Xəzər rayonunda şəhidlərin 6-cı ildönümü qeyd olunub

Xəzər rayonunda Vətən müharibəsi zamanı şəhid olan hərbçilərin əziz xatirəsi yad edilib.

Torpaqlarımızın işğaldan azad olunması və Azərbaycanın ərazi bütövlüyünün bərpası uğrunda gedən döyüşlərdə həyatını itirən şəhidlər Allahverdiyev Allahverdi Əli oğlu, Vəliyev Müslüm Vəliağa oğlu, Səlimov Cəmil Oqtay oğlu, Şirvani Həsənağa Bəhruz oğlu və Abdullayev Tural Şakir oğlunun şəhadətinin 6-cı ildönümü ilə əlaqədar Xəzər rayonunun müxtəlif qəsəbələrində anım mərasimləri keçirilib.

Mərasimlərdə Xəzər Rayon İcra Hakimiyyətinin başçısı Elşən Salahov, Yeni Azərbaycan Partiyası Xəzər rayon təşkilatının sədri Namiq Əhmədov, RİH başçısı Aparatının əməkdaşları, qəsəbə inzibati ərazi dairələri üzrə nümayəndələr, bələdiyyə sədrləri, şəhid ailələrinin üzvləri və ictimaiyyət nümayəndələri iştirak ediblər.

Anım mərasimləri zamanı şəhidlərin məzarları ziyarət olunub, onların ruhuna dualar oxunub və əziz xatirələri ehtiramla yad edilib. Çıxışlarda şəhidlərin Vətən qarşısında göstərdikləri fədakarlıqdan, döyüşlərdə keçdikləri şərəfli yoldan və göstərdikləri qəhrəmanlıqdan söz açılıb.

Qeyd olunub ki, şəhidlərin həyat yolu və Vətən uğrunda göstərdikləri şücaət gələcək nəsillər üçün örnəkdir. Onların ailələrinə göstərilən diqqət və qayğının davam etdirilməsi, şəhidlərin xatirəsinin daim yaşadılması mühüm mənəvi dəyər kimi vurğulanıb.

Mərasimlərdə şəhidlərin ailə üzvləri ilə görüşlər keçirilib, onların qayğı və müraciətləri dinlənilib. Şəhidlərin xatirəsinin yaşadılması və ailələrinin diqqətdə saxlanılması istiqamətində görülən işlərin bundan sonra da davam etdiriləcəyi bildirilib.