NATO Rusiya sərhədi yaxınlığında hərbi təlimlərə başladı

Litva, Polşa və Fransa Rusiyanın Kalininqrad vilayəti və Belarus sərhədində “Gallant Boar” (“Cəsur qaban”) adlı irimiqyaslı birgə hərbi təlimlərə başlayır.

Qanunvehedef.az xəbər verir ki, bu barədə Litva Müdafiə Nazirliyi məlumat yayıb.

Məlumata görə, iyunun 16-dan 26-dək keçiriləcək manevrlərin əsas poliqonu kimi Litvanın strateji əhəmiyyətli Suvalki dəhlizi seçilib. Polşa və Litvanın kəsişməsində yerləşən, Kalininqrad vilayəti ilə Belarus arasında qalan sözügedən ərazidə müttəfiq ölkələr regionun sürətli və effektiv müdafiəsi vərdişlərini, həmçinin qoşunların qarşılıqlı sinxronizasiyasını sınaqdan keçirəcəklər.

Paralel olaraq, NATO Rusiya sərhədləri yaxınlığında 19 dövlətin iştirakı ilə irimiqyaslı “Ramstein Flag 2026” (RAFL26) hava əməliyyatını reallaşdırır. İyunun 8-də start götürən və 12 gün davam edəcək təlimlər Danimarka, Finlandiya, Norveç, İsveç və İspaniya ərazilərini əhatə edir.

Xatırladaq ki, bir qədər əvvəl Böyük Britaniyanın “Challenger 2” döyüş tanklarını Rusiya ilə sərhəddə – Estoniyanın Vıru ərazisində yerləşdirdiyi, may ayında isə ABŞ və Böyük Britaniyanın Belarus sərhədində hərbi manevrlər etdiyi bildirilmişdi.

Qanunvehedef.az