Türkan qəsəbəsində təşkil olunan tədbir iki ölkə arasında dostluq münasibətlərinin, mədəni əlaqələrin və təhsil sahəsində əməkdaşlığın inkişafına töhfə verib

Xəzər rayonunun Türkan qəsəbəsində yerləşən 262 nömrəli tam orta məktəbdə Azərbaycan-Koreya dostluq əlaqələrinə həsr olunmuş tədbir keçirilib. İki ölkə arasında qarşılıqlı hörmətin, mədəni yaxınlığın və humanitar əməkdaşlığın təbliğinə xidmət edən tədbirdə dövlət rəsmiləri, diplomatik nümayəndələr, təhsil işçiləri, ictimaiyyət nümayəndələri və məktəblilər iştirak ediblər.

Tədbir Azərbaycan və Koreya respublikalarının dövlət himnlərinin səsləndirilməsi ilə başlayıb. Ardınca iki ölkənin tarixi, zəngin mədəni irsi, dostluq münasibətləri və müxtəlif sahələrdə inkişaf edən əməkdaşlığını əks etdirən videoçarx nümayiş olunub.

Xəzər Rayon İcra Hakimiyyətinin başçısı Elşən Salahov çıxışında Azərbaycan-Koreya münasibətlərinin inkişafında təhsil və humanitar əməkdaşlığın mühüm rol oynadığını vurğulayıb. O qeyd edib ki, təhsil sahəsində əlaqələrin genişləndirilməsi, bilik və təcrübə mübadiləsinin təşviqi, gənclərin müasir texnologiyalardan istifadə imkanlarının artırılması xalqlar arasında qarşılıqlı anlaşmanın və dostluq münasibətlərinin daha da möhkəmlənməsinə xidmət edir.

Elşən Salahov bu cür təşəbbüslərin məktəblilərin dünyagörüşünün genişlənməsi, onların fərqli mədəniyyətləri tanıması və beynəlxalq əməkdaşlıq dəyərlərinə yiyələnməsi baxımından əhəmiyyətini qeyd edib. O, təhsil müəssisələrində keçirilən beynəlxalq tədbirlərin gənc nəslin bilik və bacarıqlarının inkişafına, eləcə də dostluq və həmrəylik prinsiplərinin təşviqinə müsbət təsir göstərdiyini diqqətə çatdırıb.

Milli Məclisin deputatı, Mədəniyyət komitəsinin sədr müavini Günay Əfəndiyeva çıxışında Prezident İlham Əliyevin həyata keçirdiyi xarici siyasətin dostluq, sülh və əməkdaşlıq prinsiplərinə əsaslandığını vurğulayıb. O, Azərbaycan ilə Koreya arasında münasibətlərin müxtəlif istiqamətlərdə inkişaf etdiyini bildirərək, mədəniyyət, ədəbiyyat və akademik mübadilələrin xalqların bir-birini daha yaxından tanımasında mühüm əhəmiyyət daşıdığını qeyd edib.

Deputat bu cür tədbirlərin mədəniyyətlərarası dialoqun gücləndirilməsi, gənclərin beynəlxalq əlaqələrə marağının artırılması və ölkələr arasında qarşılıqlı etimadın möhkəmləndirilməsi baxımından əhəmiyyətini diqqətə çatdırıb.

Koreyanın Azərbaycandakı səfiri Kımqu Kanq çıxışında iki ölkə arasında mövcud tərəfdaşlıq əlaqələrindən söz açıb. O, iqtisadiyyat, kənd təsərrüfatı, səhiyyə və informasiya texnologiyaları ilə yanaşı, təhsil və mədəniyyət sahələrində əməkdaşlığın inkişafının vacibliyini vurğulayıb. Səfir belə görüşlərin xalqlar arasında qarşılıqlı anlaşmanın dərinləşməsinə və ikitərəfli münasibətlərin daha da genişlənməsinə töhfə verdiyini bildirib.

Koreya-Azərbaycan Assosiasiyasının sədri Li Min Yonq rəhbərlik etdiyi təşkilatın təhsil, mədəniyyət və iqtisadiyyat sahələrində həyata keçirdiyi fəaliyyət barədə məlumat verib. O qeyd edib ki, Azərbaycan və Koreya mədəniyyətlərinin qarşılıqlı tanıdılması, ortaq təşəbbüslərin dəstəklənməsi və insanlar arasında əlaqələrin genişləndirilməsi iki ölkənin mənəvi tərəfdaşlığının möhkəmlənməsinə xidmət edir.

Məktəbin direktoru Kəmalə Babayeva isə çıxışında beynəlxalq dostluq və əməkdaşlıq mövzusunda keçirilən tədbirlərin şagirdlərin tərbiyəsində, onların dünyagörüşünün zənginləşdirilməsində və müxtəlif xalqların mədəniyyətlərinə hörmət ruhunda yetişməsində mühüm rol oynadığını bildirib. O, məktəblilərin belə tədbirlərdə iştirakının onların yeni biliklər əldə etməsi, fərqli mədəniyyətlərlə tanış olması və beynəlxalq münasibətlərə marağının artması baxımından əhəmiyyətini vurğulayıb.

Tədbirin bədii hissəsi iştirakçılara Azərbaycan və Koreya xalqlarının zəngin mədəniyyətini yaxından tanımaq imkanı yaradıb. Proqram çərçivəsində milli rəqslər və musiqi nümunələri təqdim olunub, həmçinin Koreyanın döyüş sənəti olan taekvondo nümayiş etdirilib. Rəngarəng çıxışlar tədbirə xüsusi ab-hava qataraq iki xalqın mədəni dəyərlərinin qarşılıqlı təqdimatına şərait yaradıb.

Tədbirin ən əlamətdar məqamlarından biri isə Türkan qəsəbəsində yerləşən orta ümumtəhsil məktəblərinin yüksək nəticə göstərən şagirdlərinin mükafatlandırılması olub. Koreyanın müxtəlif şirkətlərini təmsil edən nümayəndə heyətinin üzvləri tərəfindən fərqlənən şagirdlərə kompüterlər və təqaüd mükafatları təqdim edilib.

Bu təşəbbüs istedadlı və çalışqan şagirdlərin həvəsləndirilməsi, onların təhsil nailiyyətlərinin dəstəklənməsi və müasir texnologiyalardan istifadə imkanlarının genişləndirilməsi baxımından xüsusi əhəmiyyət daşıyır. Şagirdlərə göstərilən diqqət gənclərin bilik əldə etməyə, yeni bacarıqlar qazanmağa və gələcəkdə ölkənin inkişafına töhfə verməyə təşviq olunmasının vacibliyini bir daha nümayiş etdirib.

Ümumilikdə, Türkan qəsəbəsində keçirilən tədbir Azərbaycan-Koreya dostluq münasibətlərinin təhsil, mədəniyyət və humanitar əməkdaşlıq müstəvisində inkişafının əhəmiyyətini nümayiş etdirib. Belə təşəbbüslər yalnız iki xalqın mədəni irsinin tanıdılmasına deyil, həm də gənc nəslin beynəlxalq dostluq, qarşılıqlı hörmət və həmrəylik prinsipləri əsasında formalaşmasına xidmət edir.

Azərbaycan və Koreya arasında dostluq əlaqələrinin möhkəmləndirilməsinə yönələn bu görüş bir daha göstərib ki, xalqlar arasında səmimi münasibətlərin inkişafında təhsil, mədəniyyət və gənclərə göstərilən diqqət mühüm yer tutur. Türkan qəsəbəsində təşkil olunan tədbir də bu baxımdan qarşılıqlı əməkdaşlığın və dostluğun təbliği istiqamətində əlamətdar hadisə kimi yadda qalıb.

Qəni Hüseynov

Qanun və hədəf qəzetinin şöbə müdiri