Xəzər rayonunda Prezident İlham Əliyevin YAP-ın VIII Qurultayındakı nitqindən irəli gələn vəzifələr müzakirə olunub
Elşən Salahovun iştirakı ilə keçirilən müşavirədə dövlətçilik, milli təhlükəsizlik və ölkənin gələcək inkişaf istiqamətləri ətrafında geniş fikir mübadiləsi aparılıb.
Oktyabrın 20-də Xəzər rayonunda Azərbaycan Respublikasının Prezidenti İlham Əliyevin Yeni Azərbaycan Partiyasının VIII Qurultayındakı nitqindən irəli gələn vəzifələrin müzakirəsinə həsr olunmuş müşavirə keçirilib. Zirə Mədəniyyət Mərkəzi – Eko Parkda təşkil olunan tədbirdə rayonun rəhbər şəxsləri, dövlət qurumlarının nümayəndələri, şəhid ailələri, qazilər, müharibə iştirakçıları, təhsil, səhiyyə və mədəniyyət sahələrinin təmsilçiləri, eləcə də rayon ictimaiyyətinin nümayəndələri iştirak ediblər.
Müşavirədə Xəzər Rayon İcra Hakimiyyətinin başçısı Elşən Salahov, Yeni Azərbaycan Partiyası Xəzər rayon təşkilatının sədri Namiq Əhmədov, RİH başçısının müavinləri, hüquq-mühafizə orqanlarının rəhbərləri, aparatın məsul əməkdaşları, qəsəbə inzibati ərazi dairələri üzrə nümayəndələr və bələdiyyə sədrləri iştirak ediblər.
Tədbirdən əvvəl müşavirə iştirakçıları Ümummilli Lider Heydər Əliyevin abidəsini ziyarət edərək önünə gül dəstələri qoyublar. Daha sonra Ulu Öndər Heydər Əliyevin və Azərbaycanın azadlığı, ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Müşavirədə çıxış edən Xəzər Rayon İcra Hakimiyyətinin başçısı Elşən Salahov Prezident İlham Əliyevin Yeni Azərbaycan Partiyasının VIII Qurultayındakı nitqindən irəli gələn əsas vəzifələr barədə geniş məruzə ilə çıxış edib. Rayon rəhbəri vurğulayıb ki, dövlət başçısının proqram xarakterli çıxışı Azərbaycanın qarşıdakı dövr üçün inkişaf prioritetlərini, milli təhlükəsizlik məsələlərini, dövlət müstəqilliyinin möhkəmləndirilməsini və ölkənin strateji hədəflərini müəyyən edən mühüm siyasi sənəd kimi xüsusi əhəmiyyət daşıyır.
Qeyd olunub ki, Yeni Azərbaycan Partiyasının VIII Qurultayı Azərbaycanın ərazi bütövlüyünün və suverenliyinin tam bərpasından sonra keçirilməsi baxımından tarixi əhəmiyyətə malikdir. Bu mərhələdə qarşıda duran əsas vəzifələr əldə edilmiş nailiyyətlərin qorunması, ölkənin iqtisadi və hərbi qüdrətinin daha da artırılması, müstəqil dövlətçilik ənənələrinin möhkəmləndirilməsi və cəmiyyətin milli maraqlara əsaslanan ideoloji dəyərlər ətrafında birliyinin təmin edilməsidir.
Elşən Salahov diqqətə çatdırıb ki, Prezident İlham Əliyevin rəhbərliyi ilə həyata keçirilən siyasətin əsas istiqamətlərini Azərbaycanın müstəqilliyinin qorunması, dövlətçilik ənənələrinin inkişaf etdirilməsi, iqtisadi potensialın gücləndirilməsi, milli təhlükəsizliyin təmin olunması və ölkənin mövcud imkanlarından səmərəli istifadə edilməsi təşkil edir. Bu strateji xətt Azərbaycanın davamlı inkişafına, beynəlxalq mövqelərinin möhkəmlənməsinə və milli maraqlarının etibarlı şəkildə qorunmasına xidmət edir.
Məruzədə Azərbaycanın beynəlxalq münasibətlər sistemində qazandığı mövqeyə də toxunulub. Bildirilib ki, bu gün ölkəmiz müstəqil xarici siyasəti, iqtisadi və hərbi potensialı, regional proseslərə təsir imkanları və milli maraqlara əsaslanan siyasi xətti ilə beynəlxalq aləmdə nüfuzunu artırır. Azərbaycanın regionda formalaşdırdığı yeni reallıqlar, sülh və təhlükəsizlik təşəbbüsləri, eləcə də beynəlxalq əməkdaşlığın inkişafına verdiyi töhfələr ölkənin strateji əhəmiyyətini daha da yüksəldir.
Çıxış zamanı vurğulanıb ki, əldə olunan uğurların davamlılığının təmin edilməsi hər bir dövlət qurumunun, ictimai təşkilatın və vətəndaşın üzərinə mühüm məsuliyyət qoyur. Dövlət başçısının müəyyənləşdirdiyi prioritetlərin həyata keçirilməsi, cəmiyyətdə milli həmrəyliyin qorunması, gənc nəslin vətənpərvərlik ruhunda tərbiyəsi və dövlətçilik dəyərlərinin təbliği qarşıdakı dövrün əsas istiqamətləri sırasında yer alır.
Müşavirədə müxtəlif sahələri təmsil edən şəxslər də çıxış edərək Prezident İlham Əliyevin Qurultaydakı nitqinin əhəmiyyətindən, Yeni Azərbaycan Partiyasının Azərbaycanın müasir dövlətçilik tarixindəki rolundan, ölkənin siyasi, iqtisadi və hərbi sahələrdə əldə etdiyi nailiyyətlərdən, eləcə də qarşıda duran vəzifələrdən danışıblar.
183 nömrəli tam orta məktəbin direktoru Rəhilə Abbasova, Xəzər Rayon Ağsaqqallar Şurasının sədr müavini Altay Mansurov, Xəzər Tibb Mərkəzinin direktoru Mübariz Ağayev, Vətən Müharibəsi Qəhrəmanı, şəhid Elçin Mansurovun anası Məleykə Məcidova, Vətən müharibəsi iştirakçısı Emil Həsənov və 156 nömrəli tam orta məktəbin müəllimi, əməkdar müəllim Mənzər Ağabəyova çıxışlarında ölkədə həyata keçirilən dövlət siyasətinin əhəmiyyətini, milli birliyin və həmrəyliyin qorunmasının vacibliyini diqqətə çatdırıblar.
Natiqlər qeyd ediblər ki, Yeni Azərbaycan Partiyası Ümummilli Lider Heydər Əliyevin siyasi irsinin davam etdirilməsində, müstəqil Azərbaycanın inkişaf strategiyasının formalaşmasında və cəmiyyətin müxtəlif təbəqələrinin vahid məqsədlər ətrafında birləşməsində mühüm rol oynayır. Prezident İlham Əliyevin rəhbərliyi ilə əldə edilən nailiyyətlər ölkənin gələcək inkişafı üçün möhkəm zəmin yaradır.
Şəhid ailələrinin, qazilərin və müharibə iştirakçılarının tədbirdə iştirakı Vətənə xidmət, dövlətə sədaqət və milli həmrəylik kimi dəyərlərin cəmiyyət həyatındakı xüsusi yerini bir daha nümayiş etdirib. Çıxışlarda Azərbaycanın ərazi bütövlüyü və suverenliyi uğrunda mübarizənin tarixi əhəmiyyəti vurğulanıb, şəhidlərin xatirəsinin daim uca tutulmasının və qazilərə göstərilən diqqətin davam etdirilməsinin vacibliyi qeyd olunub.
Müşavirənin sonunda Prezident İlham Əliyevin Yeni Azərbaycan Partiyasının VIII Qurultayındakı nitqindən irəli gələn tapşırıq və tövsiyələrin məsuliyyətlə yerinə yetirilməsinin vacibliyi diqqətə çatdırılıb. Bildirilib ki, dövlətin müəyyən etdiyi strateji hədəflərə nail olmaq üçün hər bir vətəndaşın, dövlət qulluqçusunun və partiya üzvünün üzərinə düşən vəzifələri layiqincə yerinə yetirməsi mühüm əhəmiyyət daşıyır.
Xəzər rayonunda keçirilən müşavirə dövlətçilik prinsiplərinin, milli maraqların, vətənpərvərlik ideyalarının və ictimai həmrəyliyin təşviqi baxımından əhəmiyyətli tədbir kimi yadda qalıb. Tədbirdə səsləndirilən fikirlər bir daha göstərib ki, ölkənin gələcək inkişafı, müstəqilliyin möhkəmləndirilməsi və əldə edilmiş tarixi nailiyyətlərin qorunması ümumi məsuliyyət və birgə fəaliyyət tələb edir.
Qəni Hüseynov
