Kreml koronadan Putinin reytinqi üçün istifadə edir

Kreml regionlardan koronavirusla mübarizə məsələsinin işıqlandırılması zamanı pozitiv məlumatlar verilməsini tələb edib. Bu, Prezident Vladimir Putinin reytinqinin artırılması üçün vacibdir.
Qanunvehedef.az xəbər verir ki, bu məlumatı “Meduza” saytı öz mənbələrinə istinadən yayıb. Məlumata görə, Kreml koronavirusla mübarizədə qubernatorların fəaliyyətini 3 əsas kriteriya üzrə dəyərləndirəcək. Bu kriteriyaların yataq fondunun yaradılması, ayrılmış pulun mənimsənilməsi və çaxnaşmanın qarşısının alınmasından ibarət olacağı bildirilib:
“Regionlardan epidemiya ilə bağlı informasiyaların işıqlandırılması zamanı onun pozitiv yöndən verilməsinin tələb edildiyi vurğulanıb. Bu, Putinin reytinqinin artırılması üçün vacibdir. Federal informasiya gündəmi “Rusiya - güclü, effektiv dövlətdir” formatında qurulmalıdır. Digər ölkələrin problemləri haqqında xəbərlər tamaşaçının ABŞ və Avropada hər şeyin qaydasında olmadığı, əvəzində Rusiyada hər şeyin operativ qaydada həll edildiyinə dair təəssürat yaradılması üçün lazımdır. Bu konsepsiyaya görə, Vladimir Putin gərək ölkənin xilaskarı kimi görünsün”.