1 Avqust – Azərbaycan Əlifbası və Azərbaycan Dili Günüdür
Hər il 1 avqust ölkəmizdə Azərbaycan Əlifbası və Azərbaycan Dili Günü kimi qeyd olunur. Bu əlamətdar gün Azərbaycan xalqının milli-mənəvi dəyərlərinin, ana dilinin saflığının qorunması, əlifbamızın inkişafı və dövlət dilimizin nüfuzunun daha da yüksəldilməsi baxımından xüsusi əhəmiyyət daşıyır.
Azərbaycan dili xalqımızın milli kimliyini, tarixi yaddaşını, zəngin mədəni irsini və mənəvi dəyərlərini yaşadan ən böyük sərvətlərdən biridir. Min illər boyu formalaşaraq inkişaf edən ana dilimiz xalqımızın düşüncə tərzini, adət-ənənələrini, ədəbiyyatını və mədəniyyətini nəsildən-nəslə ötürən müqəddəs mənəvi körpüdür. Bu dil dahi şair və yazıçılarımızın yaratdığı ölməz əsərlərlə daha da zənginləşmiş, dünya mədəniyyətində öz layiqli yerini tutmuşdur.
Müstəqillik illərində Azərbaycan dilinin dövlət dili kimi mövqeyinin möhkəmləndirilməsi istiqamətində mühüm addımlar atılmışdır. Ümummilli Lider Heydər Əliyevin ana dilimizin qorunması və inkişafı sahəsində həyata keçirdiyi məqsədyönlü siyasət nəticəsində dövlət dilinin tətbiqi genişlənmiş, latın qrafikalı Azərbaycan əlifbasına tam keçid təmin edilmiş, milli-mənəvi dəyərlərimizin qorunmasına mühüm töhfələr verilmişdir.
2001-ci il 9 avqust tarixində imzalanmış müvafiq fərmana əsasən, hər il 1 avqust ölkəmizdə Azərbaycan Əlifbası və Azərbaycan Dili Günü kimi qeyd edilir. Bu qərar ana dilimizin inkişafına göstərilən dövlət qayğısının, milli kimliyimizə və mənəvi irsimizə verilən yüksək dəyərin bariz nümunəsidir.
Bu gün Azərbaycan Respublikasının Prezidenti cənab İlham Əliyev tərəfindən də dövlət dilinin saflığının qorunması, düzgün tətbiqi, zənginləşdirilməsi və gələcək nəsillərə olduğu kimi çatdırılması istiqamətində ardıcıl tədbirlər həyata keçirilir. Müasir dövrdə qloballaşma və informasiya texnologiyalarının sürətli inkişafı şəraitində ana dilimizin qorunması hər bir vətəndaşın mənəvi borcudur.
Azərbaycan dili təkcə ünsiyyət vasitəsi deyil, xalqımızın milli birliyinin, dövlətçiliyinin və müstəqilliyinin əsas rəmzlərindən biridir. Dilimizə hörmət etmək, onu düzgün danışmaq və yazmaq, yad təsirlərdən qorumaq hər birimizin vətəndaşlıq məsuliyyətidir.
1 Avqust – Azərbaycan Əlifbası və Azərbaycan Dili Günü münasibətilə bütün Azərbaycan xalqını, elm və təhsil işçilərini, ziyalıları, müəllimləri, yazıçıları, jurnalistləri və ana dilimizin keşiyində dayanan hər kəsi ürəkdən təbrik edir, dilimizin əbədi yaşamasını, daha da zənginləşərək gələcək nəsillərə ötürülməsini arzulayırıq.
Ana dilimiz milli varlığımızın, dövlətçiliyimizin və mənəvi birliyimizin ən qüdrətli dayağıdır. Azərbaycan dili yaşadıqca xalqımızın tarixi, mədəniyyəti və milli ruhu da daim yaşayacaq.
Qəni Hüseynov
Qanun və hədəf qəzetinin şöbə müdiri
