Qala qəsəbəsində sakinlərlə növbəti səyyar qəbul keçirilib

Azərbaycan Respublikası Prezidentinin tapşırıq və tövsiyələrinə uyğun olaraq, vətəndaşların müraciətlərinin yerində dinlənilməsi və əhalini narahat edən məsələlərin operativ həlli məqsədilə qəsəbələrdə sakinlərlə səyyar görüşlərin keçirilməsi davam etdirilir.

Sentyabrın 2-də Xəzər Rayon İcra Hakimiyyətinin başçısı Elşən Salahov Qala qəsəbəsi, 92 saylı tam orta məktəbdə sakinlərlə növbəti səyyar qəbul keçirib.

Görüşdə Rayon İcra Hakimiyyəti başçısı Aparatının məsul əməkdaşları, Qala qəsəbəsi üzrə inzibati ərazi dairəsinin nümayəndəsi, bələdiyyə sədri, həmçinin rayonun idarə, müəssisə və xidmət təşkilatlarının rəhbərləri iştirak ediblər.

Səyyar qəbul zamanı sakinlərin müraciət və təklifləri diqqətlə dinlənilib, onları narahat edən məsələlər ətraflı müzakirə olunub. Qaldırılan problemlərin qanunvericiliyin tələblərinə uyğun araşdırılması və mümkün qədər operativ həlli məqsədilə aidiyyəti qurumların rəhbərlərinə müvafiq tapşırıqlar verilib.

Keçirilən bu cür görüşlər vətəndaşların problemlərinin birbaşa yerində öyrənilməsi, onların həlli istiqamətində çevik tədbirlərin görülməsi və sakinlərlə qarşılıqlı əlaqənin daha da gücləndirilməsi baxımından mühüm əhəmiyyət daşıyır.

 
   Qəni Hüseynov