Şimali Koreya ordunu sərhədə toplayır

Şimali Koreya öz hərbçilərini Cənubi Koreya ilə sərhəddə yerləşən boşaldılmış postlara göndərib.
Qanunvehedef.az xəbər verir ki, bu məlumatı “Yonhap” agentliyi öz mənbələrinə istinadən yayıb.
Məlumata görə, Şimali Koreya tərəfdə belə postların sayı 150 ədəddir. Onlardan 10-nu potensial toqquşma əraziləri sayılan bölgələrdə yerləşir.
Yüzlərlə Şimali Koreya əsgərinin artıq Keson sənaye kompleksində müşahidə edildiyi də açıqlanıb. Məhz bu kompleksdə yerləşən Cənubi Koreya müəssisələrində 2016-cı ilə qədər Şimali Koreyadan olan 50 min işçinin çalışdığı vurğulanıb.
Qeyd edək ki, bundan öncə Pxenyan 2018-ci ildə imzalanmış gərginliyin azaldılmasına dair razılaşmadan faktiki olaraq imtina edib. Şimali Koreya Baş Qərargahı Kımqansan və Kesonda hərbi bölmələrini yerləşdirmək, Cənubi Koreya yaxınlığında bütün hərbi təlimləri yeniləmək haqqında qərar qəbul edib.