“Bu ölkəni tərk edin” - ABŞ-dən xəbərdarlıq

ABŞ hökuməti Livanda təhlükəsizlik vəziyyətinin sürətlə dəyişdiyini əsas gətirərək, vətəndaşlarını bu ölkəni tərk etməyə çağırıb.

Qanunvehedef.az xəbər verir ki, bu barədə Beyrutdakı ABŞ səfirliyinin yaydığı açıqlamada deyilir.

Qeyd olunub ki, bölgədə vəziyyət mürəkkəb olaraq qalır və qısa müddətdə daha da pisləşə bilər. Bu səbəbdən ABŞ vətəndaşlarına kommersiya uçuşları mövcud olduğu müddətdə Livanı tərk etmək tövsiyə edilib.

Səfirlik ölkəni tərk etməməyi seçən vətəndaşlara fövqəladə hallara hazır olmalarını və hadisələrin inkişafını diqqətlə izləmələrini tövsiyə edib.

Qeyd edək ki, çağırış bölgədə davam edən gərginlik fonunda edilib. İsrail ordusu martın əvvəlindən Livanın cənubuna intensiv hava hücumları həyata keçirib və bəzi ərazilərə nəzarəti ələ keçirib. Bu proses nəticəsində ölkədə bir milyondan çox insanın məcburi köçkünə çevrildiyi bildirilir.

Livan və İsrail arasında 17 apreldə 10 günlük müvəqqəti atəşkəs qüvvəyə minsə də, tərəflər arasında qarşıdurmaların davam etdiyi qeyd olunur. İsrail Baş naziri Benyamin Netanyahu atəşkəsi qəbul etdiklərini bildirsə də, əməliyyatların tam dayandırılmayacağını vurğulayıb. “Hizbullah” da atəşkəs pozuntularına cavab verdiyini açıqlayıb.

Qanunvehedef.az