Priqojin Şoyqunu Baxmuta çağırdı

“Vaqner” özəl hərbi şirkətinin rəhbəri Yevgeni Priqojin Rusiyanın müdafiə naziri Sergey Şoyqunu hazırda döyüşlərin davam etdiyi Ukraynanın Baxmut şəhərinə çağırıb.
Qanunvehedef.az Rusiya mediasına istinadən xəbər verir ki, bu barədə məlumat Priqojinin Şoyquya ünvanladığı məktubda yer alıb.
O, Şoyqunun Baxmuta gələrək orada yaranan vəziyyəti şəxsən qiymətləndirməsini istəyib.
Məktubda, həmçinin qeyd olunur ki, “Vaqner” döyüşçüləri hazırda Baxmutun 95%-dən çox hissəsinə nəzarət edirlər və hücumu davam etdirirlər: “Buna baxmayaraq, Ukrayna ordusu Rusiya Silahlı Qüvvələrinin bölmələrinin yerləşdiyi cinahlarda bir sıra uğurlu əks-hücum həyata keçirib”.
Xatırladaq ki, bir müddət əvvəl Y.Priqojinin teleqram kanalında yerdə onlarla cəsədin olduğunu əks etdirən video yayılıb. Görüntülərdə Priqojin qeyri-qanuni silahlı birləşmə üzvlərinin meyitlərini göstərərək onların mayın 4-ü Ukraynada müharibədə həlak olduqlarını iddia edir. Buna səbəb kimi isə 70 faiz silah-sursat çatışmazlığını göstərir. Bununla yanaşı, “Vaqner” muzdlularının mayın 10-u Baxmutu tərk edərək mövqelərini Rusiya ordusunun bölmələrinə təhvil verəcəkləri barədə məlumat yayılıb.