Xəzər rayonunda abadlıq-quruculuq işlərinə başlanılıb
Yaz-yay mövsümü ilə əlaqədar Bakı şəhərində aparılan genişmiqyaslı abadlıq-quruculuq işləri çərçivəsində Xəzər rayonu ərazisində də təmir-bərpa işlərinə başlanılmışdır.
Xəzər Rayon İcra Hakimiyyətinin təşkilatçılığı ilə rayonun bütün qəsəbələrini əhatə etməklə küçə və parklarda abadlıq, təmir-bərpa, eyni zamanda yaşıllıqların salınması və onlara aqrotexniki qulluq işləri uğurla həyata keçirilir.
Belə ki, rayonun Mərdəkan qəsəbəsindəki parklarda, eyni zamanda S.Yesenin və Z.Tağıyev küçələrində, Buzovna qəsəbəsi R.İmanov küçəsində yerləşən parkda, həmçinin M.Sübhi, R.İmanov, H.Eyvazov küçələrində, Şağan qəsəbəsi H.Xanızadə və N.Məmmədov küçələrində, Mərdəkan-Buzovna və Mərdəkan-Qala şoselərində abadlıq, təmir-bərpa işləri görülərək yaşıllıq sahələri genişləndirilmişdir.
Görülən işlər çərçivəsində skamyalar təmir olunaraq rənglənib, aşınmış və yararsız daş plitələr bərpa olunub, idman qurğuları təmir edilib, yol kənarında hasarlar və giriş qapıları rənglənib, yeni ağac tingləri, dekorativ kollar və gül-çiçək əkilərək yaşıllıqlara aqrotexniki qulluq göstərilib.
Qeyd edək ki, hal-hazırda bu istiqamətdə işlər davam etdirilir.
Qəni Hüseyinov
