Xəzər rayonunda abadlıq-quruculuq işləri davam edir
Yaz-yay mövsümü ilə əlaqədar Bakı şəhərində aparılan genişmiqyaslı abadlıq-quruculuq işləri çərçivəsində Xəzər rayonu ərazisində də təmir-bərpa işləri davam etdirilir.
Belə ki, rayonun Şüvəlan, Türkan və Zirə qəsəbələrində yerləşən parklarda, habelə Şüvəlan qəsəbəsi A.İldırım küçəsində, Qala qəsəbəsi Mərdəkan-Qala şosesində, Türkan qəsəbəsi A.Abdullayev və 100-cü Türkan küçələrində, eləcə də Zirə qəsəbəsi S.Ə.Şirvani və 57-ci Zirə küçələrində abadlıq və təmir-bərpa işləri həyata keçirilmiş, yaşıllıq zolaqları genişləndirilmişdir.
Görülən işlər çərçivəsində skamyalar təmir olunaraq rənglənib, aşınmış və yararsız daş plitələr bərpa olunub, idman və uşaq əyləncə qurğuları təmir edilərək yuyulub, yol kənarında hasarlar və giriş qapıları rənglənib, yeni ağac tingləri, dekorativ kollar və gül-çiçək əkilərək yaşıllıqlara aqrotexniki qulluq göstərilib.
Hal-hazırda bu istiqamətdə işlər davam etdirilir.
Qəni Hüseynov
