Güclü yağışdan sonra Xəzər rayonunda genişmiqyaslı iməclik keçirilib
Bir neçə gün ərzində Bakı şəhərinə yağan şiddətli yağışlardan sonra onun fəsadlarının aradan qaldırılması və şəhərin sanitar-təmizlik səviyyəsinin lazımı səviyyəyə çatdırılması məqsədilə Bakı Şəhər İcra Hakimiyyəti tərəfindən verilmiş tapşırığa uyğun olaraq, mart ayının 30-u səhər saatlarından etibarən Xəzər rayonunda da növbəti genişmiqyaslı iməclik keçirilib.
Xəzər Rayon İcra Hakimiyyətinin təşkilatçılığı və Rayon Mənzil Kommunal Təsərrüfatı Birliyi, Rayon Yaşıllaşdırma Sahəsi, rayonun təhsil-səhiyyə, idarə və müəssisələrin kollektivləri cəlb edilməklə, o cümlədən qəsəbə inzibati ərazi dairəsi üzrə nümayəndəliklərin və qəsəbə bələdiyyələrinin iştirakı ilə rayonun bütün qəsəbələri əhatə olunmaqla təmizlik və abadlıq işləri görülüb.
İməclik zamanı prospekt və küçələrin, səkilərin, bordürlərin, işıq dirəklərinin, məhəccərlərin, park və istirahət yerlərində oturacaqların yuyulması həyata keçirilib, həyət və yaşayış məhəllələrində təmizlik işləri görülüb. Həmçinin sahibkar və özəl sektorda çalışanlar da iməcliyə fəal qoşularaq, ictimai-iaşə, ticarət və digər obyektlərin vitrinlərinin təmizlənməsi və ətrafında səliqə-sahman işləri aparılmasını təmin ediblər.
Eyni zamanda Rayon Yaşıllaşdırma Sahəsinin əməkdaşları tərəfindən yol və prospektlərin kənarlarındakı ağacların və yaşıllıqların üzərinə yığılan toz-torpağın yuyulması, onlara aqrotexniki qulluq göstərilməsi də həyata keçirilib.
Qəni Hüseynov
