FHN-in təşkilatçılığı ilə Ümumdünya Mülki Müdafiə Gününə həsr olunmuş tədbir keçirilib

  FHN-in təşkilatçılığı ilə Ümumdünya Mülki Müdafiə Gününə həsr olunmuş tədbir keçirilib
  Fövqəladə Hallar Nazirliyinin Mülki müdafiə işinin təşkili Baş idarəsinin təşkilatçılığı ilə Azərbaycan Milli Elmlər Akademiyasında Ümumdünya Mülki Müdafiə Gününə həsr olunmuş tədbir keçirilib.
    “Mülki müdafiə - əhalinin təhlükəsizliyinin təminatıdır” mövzusunda keçirilən tədbirdə Fövqəladə Hallar Nazirliyinin, Azərbaycan Milli Elmlər Akademiyasının, müvafiq nazirliklərin, aidiyyəti dövlət orqanlarının mülki müdafiə sahəsində məsul vəzifəli şəxsləri, rayon icra hakimiyyəti orqanlarının fövqəladə hallar komissiyalarının sədrləri və beynəlxalq təşkilatların nümayəndələri iştirak edib.
    Əvvəlcə, tədbir iştirakçıları Ulu Öndər Heydər Əliyevin büstü önünə əklil qoyub, Ümummilli Liderin əziz xatirəsini ehtiramla yad ediblər.
   Tədbirdə FHN-in istifadəsində olan müasir tipli mülki müdafiə əmlak və avadanlıqları - tənəffüs orqanlarının və dəri səthinin fərdi mühafizə vasitələri, radiasiya, kimyəvi kəşfiyyat və dozimetrik nəzarət cihazları, radioloji və kimyəvi kəşfiyyatın aparılması üçün məsafədən idarə olunan robot nümayiş etdirilib.
   Toplantını giriş sözü ilə açan Azərbaycan Milli Elmlər Akademiyasının prezidenti akademik İsa Həbibbəyli Ümumdünya Mülki Müdafiə Günü, onun məqsəd və vəzifələri barədə məlumat verib, əhalinin mühafizəsinin təmin edilməsində mülki müdafiənin mühüm rol oynadığını diqqətə çatdıraraq, bu kimi tədbirlərin mülki müdafiə sahəsinin inkişaf etdirilməsinə öz töhfəsini verdiyini qeyd edib.
   Sonra mülki müdafiə sahəsində Fövqəladə Hallar Nazirliyinin fəaliyyəti barədə videoçarx nümayiş olunub.
   Tədbirdə çıxış edən FHN-in Mülki müdafiə işinin təşkili Baş idarəsinin rəisi general-mayor Niyazi Zamanov mülki müdafiə işinin effektiv təşkilində Beynəlxalq Mülki Müdafiə Təşkilatının rolundan və bu təşkilatın Baş Assambleyası tərəfindən müxtəlif illərdə keçirilmiş sessiyalarında Nazirliyin fəaliyyətindən danışıb. Baş idarə rəisi vurğulayıb ki, Ümumdünya Mülki Müdafiə Gününün qeyd olunmasında əsas məqsəd ictimaiyyətin diqqətini bir daha əhali və ərazilərin fövqəladə hadisələrdən mühafizəsi olan mülki müdafiə işinin təşkili məsələlərinə cəlb etməkdir. Bildirilib ki, 1 mart - Ümumdünya Mülki Müdafiə Gününün qeyd olunması ilə bağlı ölkəmizdə mülki müdafiənin təbliği sahəsində müxtəlif tədbirlərin, o cümlədən konfransların, açıq dərslərin, təlimlərin keçirilməsi böyük əhəmiyyətə malikdir.
   Çıxışında Baş idarə rəisi ölkədə mülki müdafiə tədbirləri, mülki müdafiə işinin təşkili və həyata keçirilməsi sahəsində aidiyyəti qurumların vəzifələri, bu istiqamətdə Fövqəladə Hallar Nazirliyinin fəaliyyəti və görülən işlər haqqında geniş məlumat verib, mülki müdafiə sahəsinin inkişafının əhalinin təhlükəsizliyinin təmin edilməsi baxımından əhəmiyyətini diqqətə çatdırıb.
   Tədbirdə Ümumdünya Səhiyyə Təşkilatının Azərbaycandakı nümayəndəliyinin, “Azercell Telekom” MMC-nin, “Azərbaycan Dəmir Yolları” QSC-nin əməkdaşları, Xəzər Rayon İcra Hakimiyyətinin Fövqəladə Hallar Komissiyasının sədri və digərləri mövzu ətrafında çıxışlar ediblər.
   Sonda 1 mart - Ümumdünya Mülki Müdafiə Günü münasibəti ilə, eləcə də təmsil olunduqları təşkilatlarda mülki müdafiə işinin təşkili sahəsində səmərəli fəaliyyətlərinə görə fərqlənən şəxslər Fövqəladə Hallar Nazirliyi adından “Fəxri fərman”la təltif olunublar.
 
https://fhn.gov.az/az/melumatlar/fhn-in-teskilatciligi-ile-umumdunya-mulki-mudafie-gunune-hesr-olunmus-tedbir-kecirilib-0da29370 

Qəni Hüseynov

шаблоны для dle 11.2