Martın 25-i "Qanun və Hədəf" qəzetinin baş redaktor müavini Güllü Nemətqızının (Güllü Nemət qızı Məmmədova) təvəllüd günüdür. Gəncə şəhərində ziyalı ailəsində anadan olmuşdur. 1968-ci ildə Gəncə şəhər 6 saylı orta məktəbi müvəffəqiyyətlə bitirərək Azərbaycan Dövlət Universitetinin Kimya fakültəsinə daxil olmuşdur. 1973-cü ildə ali təhsilini başa çatdırmışdır. 1976-cı ildə pedaqoji fəaliyyətə başlamışdır. Müəllim, sinif rəhbəri, təlim-tərbiyə işləri üzrə direktor müavini, məktəb psixoloqu vəzifələrində qabaqcıl iş təcrübəsinə görə dəfələrlə müxtəlif titullara, fəxri adlara layiq görülmüş, Müəllimləri Təkmilləşdirmə İnstitutunda mühazirəçilər qrupunun üzvü olmuşdur. Qabaqcıl sinif rəhbərlərinin müsabiqəsində I yeri qazanmışdır. Ali kateqoriyalı müəllimdir.  

Pedaqoji maarifçilik xəttinə önəm verən "Elm-təhsil" qəzeti ilə əməkdaşlıq etməsi G.Nemətqızının jurnalistikada da uğurlarına yol açmışdır.  Güllü müəllimənin publisistik yazıları, oçerkləri oxucular tərəfindən maraqla qarşılanmış, söz sərrafları tərəfindən dəyərləndirilmişdir. Azərbaycan Jurnalistlər Birliyinin üzvü, Həsən bəy Zərdabi adına və Abdulla Şaiq adına ədəbi mükafatların laureatıdır. Həm məktəb psixoloqu, həm jurnalist kimi fəaliyyət göstərən Güllü xanım eyni zamanda analıq, nənəlik vəzifəsinin də öhdəsindən layiqincə gəlir.

Görünür, məhz bahar fəslində dünyaya göz açması səbəbindəndir ki, Güllü xanım canında, ruhunda yaratmaq eşqini, enerjini qoruyub-saxlamağı bacarır. Həyat yolu xeyirxahlıq, nəciblik, işgüzarlıq üçün sanki bir örnəkdir.

Yaz təravətli yazılar yazan Güllü Nemətqızını "Qanun və Hədəf" qəzetinin kollektivi adından ikiqat təbrik edirəm - həm ad günü, həm də Novruz bayramı münasibətilə. Qoy, ilham çeşməniz daim qaynasın, Güllü xanım! Uzun ömür, can sağlığı, əzizləriniz əhatəsində şad günlər arzulayıram.

Mehman Ziyadov,

"Qanun və Hədəf" qəzetinin təsisçisi və baş redaktoru