Türkiyəli narkobaron öz ölkəsinə təhvil veriləcək - QƏRAR

Almaniyanın beynəlxalq axtarışa verdiyi Türkiyə vətəndaşı Turqut Kamal Abdulsəlamın barəsindəki ekstradisiya ilə bağlı məhkəmə prosesi davam edib.
 
Qanunvehedef.az-ın məlumatına görə, Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə qərar elan edilib. Hakimlər kollegiyasının qərarına görə, Turqut Kamal Abdulsəlam Türkiyəyə ekstradisiya olunacaq.
 
Hakim bildirib ki, Türkiyənin sorğusu ilə yanaşı Almaniyanın da bu şəxslə bağlı sorğusu var: "Rəqabətli sorğular olduğundan məhkəmə bu zaman seçim edir. Azyaşlı övladları olduğu üçün onun Almaniyaya verilməsindən imtina edilib".
 
İttihama görə, T. K. Abdulsəlam Almaniyada narkotik vasitələrin dövriyyəsində təqsirləndirilir. O, 2006-2007-ci ildə Almaniya və Hollandiyaya narkotik vasitələrin daşınmasını maliyyələşdirib.
Həmçinin T. K. Abdulsəlam Türkiyə tərəfindən də axtarışa verilib.