Biləsuvarda ağır qəza: 2 ölü, 2 yaralı
Biləsuvarda minik və yük avtomobili toqquşub, nəticədə iki nəfər ölüb, iki nəfər yaralanıb.
APA-nın cənub bürosunun məlumatına görə, hadisə Ələt-Astara magistral yolunun 103-cü km-də, rayonun Xırmabdalı kəndi ərazisində baş verib.
VAZ markalı minik avtomobil ilə "Suzuki" markalı yük maşınının tioqquşması zamanı minik maşınında olan Cəlilabad rayon sakinləri - 1992-ci il təvəllüdlü Rəşad Əlizadə oğlu Həsənov və 1987-ci il təvəllüdlü Saməddin Vaqif oğlu İsmayılov ölüb. Digər iki nəfər - 1987-ci il təvəllüdlü Şəhriyar Azad oğlu Cananov və 1992-ci il təvəllüdlü Əli Sahib oğlu Ağayev müxtəlif dərəcəli bədən xəsarətləri alaraq Biləsuvar Rayon Mərkəzi Xəstəxanasına çatdırılıb.
Hadisə yerinə FHN-in xilasediciləri cəlb olunub. Onlar deformasiyaya uğramış minik avtomobilində qalan meyitləri və yük maşınında olan yaralını çıxararaq aidiyyəti üzrə təhvil veriblər.
Faktla bağlı araşdırma aparılır.
