Evlər sökülür: yeni yol çəkilişi başladı - Açıqlama

Paytaxtın Yasamal rayonu, Mirzə Cabbar Məmmədzadə və Nazim Hikmət küçələrində yolun genişləndirilməsi məqsədilə aparılan işlərlə əlaqədar yol kənarında sökülən evlərə görə sakinlərə nəzərdə tutulmuş təzminat artıq ödənilib.
Bu sözləri Qanunvehedef.az-a Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli Yasamal rayonu Şərifzadə küçəsində, ASAN Xidmətin binasının arxasındakı məhəllədə aparılan işlər barədə danışarkən bildirib.
A.Nəcəfli qeyd edib ki, hazırda söküntü işləri hələ də davam edir:
“Yaşayış evləri üçün 1 kvadrat metrinə görə 1200 manat təzminat ödənilib. Köçürülən ev və obyektlərin qanuni və qanunsuz olmasına baxmayaraq, ev və obyekt sahiblərinin hamısına kompensasiyalar veriləcək.
Hazırda ərazidə işlər davam edir. Evlərin söküntüsü ilə paralel yolun çəkilməsilə bağlı işlər də aparılır. Bu ilin sonuna qədər aparılan işlər tamamilə bitəcək, yol təhvil veriləcək”.
Qeyd edək ki, sözügedən yolda aparılan işlərlə əlaqədar artıq 75 evin söküntüsünə başlanılıb. Ərazidə 4 zolaqdan ibarət, müasir tələblərə cavab verən yol çəkiləcək.
Yeni yol Şərifzadə küçəsi ilə Bakı xarici dairəvi yolu birləşdirəcək. Yeni yol Yasamal bazarının yaxınlığından, yəni ASAN Xidmətin binasının kənarı ilə çəkilir.